Geimhreadh eile chugainn

Geimhreadh eile chugainn

Geimhreadh eile an doras isteach chugainn,

Is na laethe ag cailleadh a ré,

Mar nach follas lámh in uacthar na hoíche

Is í ag ramhrú ar sheangú an lae.

.

Tá crainn anois fágtha gan folach,

Is fálta nocht, gan snáithe, gan scáth,

Tá na blátha seargtha, sioctha,

Is talamh féarach fágtha ina bhlár.

.

Tá muid tréigthe ag cuach is ag fáinleog,

Ag na héin úd a sheol chugainn le fonn,

Is gan fanta anois timpeall an gharraí,

Ach an spideog bhocht, an druid, is an lon.

.

Tá cúl curtha ag éin ar a gcanadh,

Is ní fhógraíonn spideog a dúshlán,

Ní chloistear ón dreoilín a rí-phort,

Nó cágaíl ó phréachán nó ó chág.

.

Tá tost tite ar éan is ar ainmhí,

Is maoile lom ar thor is ar chrann,

Ach ná caillimis dóchas, nó misneach,

Mar nach bás ach aiséirí a ndán.

.

.