Machnaimh ón Nead!

Machnaimh ón Nead!

le | 2020/04/29 | Filíocht, Pearsanta

Machnaimh ón Nead

.

Féiniúlacht caillte

i dtomhaltas forleathan

Buaileann an pandéim

.

Neadaithe sa bhaile

An domhan ina stad ar fad

Am é le machnamh

.

Ná bí ag deifriú

Dhá thrian moille le deifir

Bain ceol as an saol

.

.

.

.

.

Reflections from the Nest

.

Identity lost

in rampant consumerism

The pandemic hits

.

Sitting in our homes

The world is at a full stop

A time to reflect

.

Stop rushing about

Making all heat and no light

Appreciate life

.

.

.

Is aoibhinn liom an fhoirm fhileata a thugtar Haiku uirthi!  Thosaigh sé sa tSeapáin ag deireadh an

Seachtú haois déag. Ba é fear darb ainm Matsuo Basho a thosaigh é, agus lean mórfhilí eile é, cosúil le Kobayashi Issa, Masaoka Shiki, agus Yosa Buson. Le himeacht ama, scaip Haiku ar fud an domhain. Níl aon easpa na foirme seo in Éirinn, i mBéarla agus i nGaeilge araon.  Tá sé éasca go leor staidéar na foirme a dhéanamh ar an idirlíon, agus tá físeáin iontacha déanta ag Gabriel Rosenstock ar an ábhar. I mo thuairim, Haijin (sin mórfhile Haiku) is ea Gabriel, agus tá go leor leor dánta Haiku cumtha agus aistrithe aige, idir Ghaeilge agus Bhéarla.  Má tá suim agat, gúgláil ar ‘Gabriel Rosenstock’ agus gheobhaidh tú torthaí suimiúla ar ais.

Ar aon nós, agus mé neadaithe sa bhaile ar feadh míosa nó mar sin, thosaigh mé ag dul i dtaithí ar an saol nua atá agam ag an am éiginnte seo, nuair nach bhfuil a fhios againn cad atá i ndán dúinn.  Dúirt mé liom féin go bhfanfainn dearfach, mar ní bhíonn néal gan ghealán. Cheap mé go mb’fhéidir go mbeadh deis ar leith agam chun foghlama le linn na géarchéime atá ar siúl. Bhí an ceart agam go tréan. Lig dom é a sin a mhíniú!

Ag an nóiméad seo, fillfidh mé ar ais go dtí na dánta Haiku atá scríofa agam ag tús an ailt. Is as Gaeilge a scríobh mé iad agus ansin rinne mé an t-aistriúchán go Béarla. Bhí mé ag iarraidh taifead scríofa a dhéanamh ar céard a d’fhoghlaim mé agus mé sáinnithe sa bhaile le linn na géarchéime. Cheap mé gurb é an tslí is fearr cur síos achomair a chumadh ná trí dhánta. Cén sórt dánta? Haiku, dar ndóigh!  Chinn mé ar thrí chinn a scríobh, an chéad cheann ag baint leis an am atá caite, an dara ag baint leis an am i láthair, agus an tríú ag baint leis an am atá le teacht.

Sa chéad Haiku, is é atá i gceist ná cáineadh géar ar ár stíl beatha, stíl ar thosaigh i ndáiríre in Éirinn le flúirse na nóchaidí, nuair níor thuig glúin an Tíogair Cheiltigh an tíos. Stad an stíl sin le linn an chúlú eacnamaíochta a lean é, ach tháinig sé ar ais go tréan leis an téarnamh geilleagrach a thosaigh sa bhliain 2012.  Ní maith an rud barraíocht agus tháinig deireadh tobann leis, gan aon choinne. Tá impleacht sa tslí ar scríobh mé an Haiku seo, go mb’fhéidir gur díoltas brúidiúil a bhí ann.

Sa dara Haiku, táimid faoi dhianghlas sa bhaile. Fiú dá rachaimis amach, ní bheadh mórán le déanamh againn, mar tá beagnach gach rud dúnta sa tír, ach amháin seirbhísí riachtanacha. Ní deirtear é ach tuigeadh dúinn gur deis iontach atá ann, chun athbhreithniú a dhéanamh orainn féin.

Cuireann an tríú Haiku treoir ar fáil dúinn. Tá sé soiléir don chuid is mó dúinn anois nach bhfuil gá a bheith ag scinneadh anonn is anall, agus muid caifeach leis an airgead, ag úsáid acmhainní luachmhara an domhain mhóir, agus ag cur le truailliú na cruinne. Ach nach bhfuil sé soiléir dúinn freisin, go háirithe anois, go bhfuil rogha againn.  Nach mbeadh sé níos fearr dúinn agus don phláinéad luas ár saol a mhoilliú agus sláinte ár bpláinéad a chur san áireamh ag an am céanna? Gan dabht, bheimis níos sásta agus in ann ceol a bhaint as an saol. Nach réiteach é sin a bhfuil buntáiste ag gach taobh ann?     

.

Machnaimh ón Nead!

Gaeltacht San Diego!

le | 2020/04/22 | Pearsanta

Tá a fhios ag madraí an bhaile go mbíodh drogall ar go leor daoine Gaeilge a labhairt. Tá neart fáthanna leis sin, coimpléasc ísleachta san áireamh. Ach le forbairt ár bhféinmhuinín, d’éiríomar níos bródúla as ár gcultúr agus ár dteanga. Cur leis sin fás fíorthobann na Gaelscoileanna, á dtiomáint ag gnáthdhaoine na tíre, agus tá sé soiléir go bhfuil gluaiseacht athbheochana na Gaeilge faoi bhláth. Tá Gaeilge labhartha ag a lán daoine anois – go háirithe ag Glúin na Gaelscoile.  Cúpla bliain ó shin, i ndiaidh dóibh an ardscoil a fhágáil, bhí ach cúpla deis acu a nGaeilge a chleachtadh ach bhíodar ag lorg tionóil níos neamhfhoirmiúla ná na roghanna a bhí ar fáil. Ós rud é go bhfuil siadsan compordach ag úsáid an idirlín, thosaigh siad ag eagrú bailithe réchúiseacha ann.  Is mar sin a thosaigh Peadar Ó Caomhánaigh agus Osgur Ó Ciardha an chéad PopUp Gaeltacht ag deireadh 2016. Sháraigh na torthaí gach a raibh siad ag súil leis agus anois bíonn PopUp Gaeltachtaí ar siúl ar fud an domhain.  

Mar is eol do chách, d’athraigh gach rud nuair a tharla géarchéim an gcoróinvíris, agus anois táimid go léir neadaithe sa bhaile ar fud an domhain.  Sa cholún seo, ní dhéanfaidh mé athchúrsáil ar an nuacht uafásach a chloisimid gach lá. In ionad sin, cuirfidh mé béim ar chúrsaí na Gaeilge i rith an scartha shóisialta seo, am nach bhfuil Gaeilgeoirí in ann bailiú le chéile mar is gnách. Ach fuair fear amháin réiteach iontach don fhadhb sin.  

Ag bualadh leis don chéad uair, chaithfeá a thabhairt faoi deara an méid fuinnimh atá ag an mac léinn seo, gan trácht ar a fhéinmhuinín agus a dhíograis. Meiriceánach is ea é ó dhúchas, ach Éireannach dá thoil féin. Níl aon drogall ar an bhfear seo Gaeilge a labhairt, ach a mhalairt. Bíonn sé ag labhairt Gaeilge gach deis a fhaigheann sé. Agus mura mbíonn deis ann, cruthaíonn sé ceann!

D’eagair an fear seo an chéad PopUp Gaeltacht i gContae Shan Diego i gCalifornia breis is bliain ó shin, agus go leor eile ó shin i leith. D’fhógair sé iad ar Fhacebook agus tháinig na Gaeilgeoirí le chéile i dtithe tábhairní, agus freisin ag Teach na hÉireann i mBalboa Park i San Diego. Sin áit a gcuireann i láthair cultúr agus teanga na hÉireann. Bíonn ranganna Gaeilge ar siúl ansin, saor in aisce, á mhúineadh ag Gaeilgeoir an-díograiseach darb ainm Hofshi Shanti. Bíonn seisiúin cheoil agus damhsaí ar siúl ann go minic freisin. Mar sin, ní ionadh mór é go bhfuil roinnt mhaith daoine sa cheantar agus suim acu agus fonn orthu a gcuid Gaeilge a fheabhsú. Tharla an borradh seo a bhuí do dhaoine cosúil le Hofshi Shanti, agus an fear thuasluaite, darb ainm Jeffrey ‘Siothrún’ Sardina.

PopUp Gaeltacht i gCoraintín!

Nuair a chuirtear i bhfeidhm dianghlasáil de bharr géarchéime an gcoróinvíris, ní raibh Siothrún in ann an gnáth-PopUp a eagrú. Ach is doiligh beaguchtach a chur air! Bhuail smaoineamh é – céard faoi PopUp fíorúil? Is é atá i gceist ná PopUp go léir a dhéanamh ar an idirlíon, ní hamháin an cuireadh, ach an bailiú freisin. Le linn na géarchéime seo, tá go leor daoine ag úsáid an aip ‘Zoom’ chun ranganna a chur ar fáil, agus chun teacht le chéile ar an idirlíon. Cheap Siothrún go mbeadh ‘Zoom’ foirfe do PopUp fíorúil freisin, agus mar sin d’eagair sé ‘PopUp Gaeltacht i gCuaraintín’, agus chuir sé an focal amach ar na meáin shóisialta agus ar shuímh ghréasáin cosúil le www.peig.ie.

Gaeltacht San Diego!

D’fhoilsigh Siothrún nasc an bPopUp ar Facebook, agus d’fhreastal mé ar an chéad PopUp fíorúil sa domhan! Bhí Siothrún ag obair go dian ag cur fáilte roimh na daoine ar tháinig isteach ar líne. Bhí timpeall céad daoine ann, ó gach cearn den domhan – leis an chuid is mó as Éirinn, na Stáit Aontaithe, agus an Bhreatain Mhór . Bhí craic iontach againn go léir, agus i rith an chomhrá do bhaisteadh ‘Gaeltacht San Diego’ ar an dream ó Shan Diego! Bhíomar le chéile don tríú ‘PopUp Gaeltacht i gCuarantín’ an Satharn seo caite, agus bhí sé ar fheabhas, agus chaitheamar stáir ag caint! Má tá suim agat freastal ar an bPopUp seo a bheidh ar siúl ar gach Satharn i rith na géarchéime, cuirfear fáilte mhór romhat! Chun an cuireadh a fheiceáil, déan cuardach i bhFacebook ar ‘Pop Up Gaeltacht i gCoraintín’, et voilà!

.

Machnaimh ón Nead!

Scéal Mháire Ní Mhealláin!

le | 2020/04/15 | Cúrsaí Reatha, Polaitíocht, Stair, Tuairim

Mar is eol duit, thug Uachtarán na Stáit Aontaithe, Donald Trump, ‘Víreas na Síne’ mar ainm ar an gCoróinvíreas ar dtús. Stad sé an cleachtadh sin tar éis glao gutháin le hUachtarán na Síne, Xi Jinping. Tá cumhacht speisialta ag focail, go háirithe na focail a úsáideann Uachtarán na Stáit Aontaithe i lár géarchéime mar seo. Ba cheart don ár gceannairí sampla a thabhairt dúinn go léir maidir leis an mbealach is fearr déileáil leis. Caithfimid go léir a bheith go dubh i gcoinne an chiníochais an t-am ar fad.  Ach is cúis díomá é go méadaíonn an ciníochas aon uair a tharlaíonn pandéim.

Le déanaí, rinneadh ionsaí danartha i Londain ar Jonathan Mok, mac léinn ó Singeapór. Gabhadh beirt dhéagóirí as an tromionsaí. Dar le Jonathan, bhí fearg ar a ionsaitheoirí agus dúirt ceann acu leis “Ní theastaíonn uaim do Choróinvíreas a bheith inár dtír.”

Meascann an tseineafóibe sin le polaitíocht freisin, agus tá tú in ann é sin a fheiceáil san Eoraip in iompar náireach páirtithe na heite deise. San Iodáil, chuir Matteo Salvini (ceannaire páirtí na heite deise darb ainm ‘Lega Nord’) an milleán ar lucht iarrtha tearmainn ón Afraic, ag rá gur thug siad an Coróinvíreas isteach sa tír, agus ag moladh a dteorainneacha a dhúnadh chun iad a choimeád lasmuigh den tír. Bhí sé mícheart an milleán a chur ar na daoine bochta sin agus níl aon fhianaise ann a thacódh leis an áitiú sin. Anois, tá teorainneacha dúnta ag beagnach gach tír, ach ní dhearnadar an cinneadh sin ar chúis chiníochais, ach chun scaipeadh an víris a mhoilliú.

Is é an príomhrud anseo ná go bhfuil dualgas orainn go léir ní amháin an víreas fisiciúil a troideadh, ach an víreas intinne a thagann leis a troideadh freisin.  Is é an téarma a úsáideann an Eagraíocht Dhomhanda Sláinte (EDS) ar an víreas intinne seo ná ‘Stiogma’, a tharlaíonn nuair a chreidtear nach bhfuil duine nó grúpa daoine chomh maith leat féin.  I gcónaí, eascraíonn leithcheal as an dearcadh sin, nuair a bhíonn deis ann. Ní mór dúinn bheith i gcónaí ar ár n-aire ar mhéadú an leithcheala sin, go háirithe in amanna mar seo nuair atá géarchéim ar siúl.

Dúirt Ardstiúrthóir an EDS é seo faoi: “Déanta na fírinne, tá Stiogma níos contúirtí ná an (Coróin)víreas féin!”  Nach bhfuil an ceart aige agus nach trua mhór é nach bhfuil muid in ann deireadh a chur leis an víreas intinne sin, an Stiogma!

Ba cheart go bhféadaimis mar Éireannaigh, an Stiogma seo agus a iarmhairtí tubaisteacha a thuiscint níos éasca, mar bhíomar féin in áit na leathphingine ní rófhada ó shin. Tá scéal beag ábhartha agam chun é sin a chur i gcuimhne dúinn.

.

Rugadh agus tógadh Máire Ní Mhealláin i gCorr Chríochach, i gContae Thír Eoghain sa bhliain 1869. Chuaigh sí go Nua Eabhrac i 1883. Fuair sí obair mar chailín aimsire, agus níos déanaí mar chócaire.  Bhí seacht bpost aici mar chócaire thar thréimhse seacht mbliana. Sa phost deireanach, fuair seisear duine bás ó fhiabhras tíofóideach, agus d’fhostaigh an teaghlach imscrúdaitheoir eipidéimeolaíochta chun a dhéanamh amach céard a bhí ar siúl. Nuair a d’fhiosraigh an t-imscrúdaitheoir an scéal, fuair sé amach gur fhág Máire léirscrios tíofóidigh ina diaidh, i ngach áit ar oibrigh sí mar chócaire. B’éigean di tástáil a dhéanamh, agus fuarthas toradh deimhneach le haghaidh tíofóideach.

Coimeádadh ar leithlis í ansin ar feadh dhá bhliain ach tar éis í a bheith ag obair mar chócaire arís, fuair daoine eile an galar uaithi. Cuireadh ar ais ar leithlis í an chuid eile dá saol (23 bliana).

Cé gur aimsíodh na mílte iompróirí sláintiúil tar éis sin, ní bhfuair aon duine eile droch-cháil cosúil le Máire, agus níor choimeádadh ar leithlis aon duine eile in éadan a thola.

Cén fáth nach bhfuair Máire cothrom na Féinne? Stiogma – Bean bhocht Chaitliceach as Éirinn a bhí inti, agus ag an am sin i Meiriceá, sin ceithre stiogma!   Nuair a tháinig sé amach gur scaip sí an tíofóideach, tháinig an leithcheal amach ansin! Chuir an ‘Journal of the American Medical Association’ an tarcaisne i gceann na héagóra, nuair a thug siad an ‘leasainm ‘Typhoid Mary’ uirthi!

Scéal forálach é seo dúinn go léir go gcaithfimid troid in aghaidh galair uafásaigh an leithcheala i gcónaí, go háirithe nuair a bhíonn rudaí bunoscionn.  Táimid ag déanamh go maith in Éirinn óna thaobh sin de agus ag tabhairt sampla maith do thíortha eile. Ba cheart dúinn go léir a bheith bródúil as sin!  

.

.

.

.

.

.

.

.

.

.

.

.

.

.

.

.

.

.

.

Machnaimh ón Nead!

Faoi choinneáil sa Bhaile!

le | 2020/04/08 | Tuairim

Mar shaoránaigh fhreagracha, ag cloí go dílis le comhairle na Roinne Sláinte maidir le COVID-19, tá orainn go léir idirghníomhaíocht shóisialta a laghdú agus achar 2m a choinneáil idir muid féin agus daoine eile. Mar ainmhithe sóisialta, tá sé beagnach dodhéanta é sin a dhéanamh, go háirithe le tréimhse bhreisithe ama. Ach níl an dara rogha againn, mar más olc maoil is measa mullóg, mar a déarfá. Cén fáth na dianshrianta sin? Bhuel, táimid ag iarraidh chuar an víris a chothromú dar leis na saineolaithe atá ag tabhairt comhairle dúinn faoin gCoróinvíreas. Agus cad is brí leis an gcothromú sin, an ea? Is é atá i gceist anseo ná scaipeadh an víreas a mhoilliú, agus sa tslí sin an méid daoine infhabhtaithe leis an víreas a laghdú.  Go hidéalach, bheadh na seirbhísí sláinte phoiblí in ann déileáil le buaicráta daoine ionfhabhtaithe leis an víreas. Mar níl aon vacsaín le fáil i láthair na huaire, is é an t-aon bhealach é sin a dhéanamh ná idirghníomhaíocht shóisialta a laghdú. Caithfimid comhairle na Roinne Sláinte a dhéanamh, ní amháin dúinn féin, ach do gach duine sa tír.  Tá an dualgas poiblí sin orainn, gan dabht.

Athruithe suntasacha atá ann, agus níl sé éasca dul i dtaithí ar na cúinsí nua seo. Bímid gafa taobh istigh i rith an lae, agus tá baol ann go rachaimid as ár meabhair! Má tá tú in ann obair ón mbaile, b’fhéidir nach bhfuil an fhadhb sin agat, ach céard faoin gcuid eile againn – cad is féidir linn a dhéanamh agus muid sáinnithe sa teach ó dhubh go dubh?

Ná caill do mhisneach – tá scata rudaí le déanamh! Mar briseadh beag ón ngruaim ar fad, seo liosta beag a chuir mé le chéile ar mhaithe leis an gcraic, ach déanta na fírinne tá sé níos úsáidí dom ná mar a shamhlaigh mé!

.

10 moladh do gach duine sáinnithe sa bhaile:

1.Scríobh mé cúpla alt le déanaí ag cur i láthair na n-acmhainní flúirseacha atá ar an idirlíon ó thaobh na Gaeilge de.  Seo do sheans chun feabhas a chur ar do chuid Gaeilge. Bain triail as cúpla smaoineamh ar scríobh mé fúthu cheana agus ná bí faiteach!
2.Freastail ar rang cócaireachta ar an ríomhaire. Tá na bialanna dúnta, agus beidh tú in ann béilí blasta a réiteach duit féin agus do theaghlach!
3.Tá na hionaid aclaíochta go léir dúnta. B’fhéidir go bhfuil trealamh aclaíochta ina luí thart ag bailiú dusta. Níl am níos fearr ná anois lena thriail, nach ea?
4.Is féidir leat coinneáil i dteagmháil le do theaghlach agus cairde ó chian, ag úsáid do ríomhaire nó d’fhón póca. Tá sé éasca go leor cruinniú físchomhdhála a bheith agat le grúpa daoine, agus an chraic a bheith agaibh! Tá go leor aipeanna ar fáil chun é seo a dhéanamh: Skype, Facetime, Hangouts, Marco Polo, Houseparty san áireamh.
5.Cé nach bhfuil na pictiúrlanna oscailte, má tá Netflix nó a mhacasamhail agat, tá rogha mhór scannán agat le feiceáil. Má tá tú mearaithe ar fad leis an méid scannán atá ann, bain úsáid as liosta ar www.imdb.com, mar shampla tá an liosta ‘Na 100 scannán is fearr riamh’ go hiontach.
6.Má bhaineann tú taitneamh as léitheoireacht mar chaitheamh aimsire, is am maith é leabhar a léamh. B’fhéidir go raibh sé ar tí agat leabhar áirithe a léamh – ar aghaidh leat! Agus mura bhfuil sé agat cheana féin, b’fhéidir go bhfuil sé ar fáil ón idirlíon mar ríomhleabhar nó closleabhar! Leabhar Gaeilge atá i gceist anseo – nach ea?
7.B’fhéidir gurb é rún do chroí bheith i do scríbhneoir. Seo do sheans an t-úrscéal, an gearrscéal nó an dán atá ionat a scríobh! Tá a lán tacaíocht agus fiú amháin ranganna ar an idirlíon freisin. Níl aon leithscéal agat!
8.Tá uirlis cheoil i do gharáiste, is dócha, nár sheinm tú air le fada. Faigh é, glan é agus déan tús leis. Géillim duit go bhfuil ranganna iontacha ar www.youtube.com!
9.Le linn an ama dhéin seo, cén fáth nach bhfreastalófá ar chúrsa machnamhach. Faigh aip cosúil le Insight Timer nó Headspace, agus ar aghaidh leat!
10.Mura maith leat ceann ar bith de na moltaí thuasluaite, ná bíodh imní ort, mar choinnigh mé an moladh is fearr go dtí an deireadh. Nach bhfuil sé in am glantachán earraigh a dhéanamh!

Machnaimh ón Nead!

Baile Átha Cliath – Ionad Nuálaíochta!

le | 2020/04/01 | Cúrsaí Reatha, Cúrsaí Teanga

Bhí mé faoi gheasa le déanaí agus alt sa ‘Dublin Inquirer’ á léamh agam. Chláraigh mé lena nuachtlitir sheachtainiúil a fháil, mar is maith liom cos a choinneáil suas le nuacht áitiúil na cathrach. Chaith mé timpeall dhá bhliain déag i mo chónaí i mBaile Átha Cliath, agus is as Baile Átha Cliath mo bhean chéile freisin.  Mar sin, tá nasc againn leis an gcathair, agus is deas an rud é a bheith in ann nuacht áitiúil na cathrach a léamh gach seachtain.

Tá athruithe móra tagtha ar Bhaile Átha Cliath ó bhíomar inár gcónaí ann. Tá a fhios ag madraí an bhaile faoin fhorbraíocht tráchtála agus tithíochta a tharla sa chathair thar na blianta, agus cé chomh costasach agus atá sé árasán a fháil ar cíos ann. Tá a fhios againn freisin gur saghas creidimh is ea an pheil Ghaelach i mBaile Átha Cliath sa lá atá inniu ann, agus tá sé sin an-soiléir tar éis na ‘Dub’s’ an Corn Sam Mhic Uidhir a bhuachan cúig uaire i ndiaidh a chéile.

Ach an bhfuil a fhios agat go bhfuil an Ghaeilge tar éis láidriú i mBaile Átha Cliath le himeacht ama?  Ionad nuálaíochta atá ann ó thaobh na teanga labhartha de, go háirithe lasmuigh den seomra ranga.  

Lig dom cúpla sampla a lua anseo, agus tiocfaidh mé ar ais go dtí an t-alt thuasluaite mar chuid den phlé sin.

.

Na Gaeil Óga, CLG

Is cumann lán-Ghaeilge Cumann Lúthchleas Gael i mBaile Átha Cliath é Na Gaeil Óga, CLG a bunaíodh sa bhliain 2010.  Cé gurb as Baile Átha Cliath go leor de bhaill an chumainn, tá roinnt mhaith as gach cuid eile den tír chomh maith, na Gaeltachtaí san áireamh. Bhí imreoirí as tíortha eile ag imirt leo ó am go ham freisin.

Tá físeán iontach ar youtube.com (cuardaigh ar ‘Dub Club Chronicles Na Gaeil Óga’). Maítear ag deireadh an fhíseáin go bhfuil dhá fhoireann is fiche acu agus dhá chéad, tríocha is a haon ball fásta ann anois.

.

PopUpGaeltacht

“Is coincheap foinse-oscailte (open source) í #PopUpGaeltacht ina roghnaítear teach tábhairne uair sa mhí agus bailíonn Gaeil ann. Chun ól, like.” Sin an chéad rud a fheiceann tú nuair a théann tú go dtí https://www.facebook.com/popupgaeltacht/.

Thosaigh PopUpGaeltachtaí den chéad uair ag deireadh 2016 i mBaile Átha Cliath. Ba iad Peadar Ó’Caomhánaigh agus Osgur Ó’Ciardha comhbhunaitheoirí na gluaiseachta seo, nuair a d’aithin siad nach raibh ionad neamhfhoirmeálta acu chun casadh le Gaeilgeoirí eile.

Mar a dúirt Peadar faoin gcoincheap seo: “An aidhm atá againn ná muintir na teanga i mBaile Átha Cliath, ar an gcéad dul síos i mBaile Átha Cliath ar aon nós, a chruinniú le chéile áit éigin traidisiúnta dos na Gaeil oíche amháin…”

D’éirigh siad chomh maith leis an chéad PopUp i dteach tábhairne i mBaile Átha Cliath gur scaip PopUpGaeltachtaí mar a bheadh falscaí ar an gcnoc! Anois bíonn PopUpGaeltachtaí ní amháin i mBaile Átha Cliath, ach ar fud na tíre agus ar fud an domhain féin!

.

Cnocadóirí

Nach smaoineamh iontach é a bheith amuigh faoin spéir ar shiúlóid sna sléibhte le grúpa daoine agus sibh go léir ag caint Gaeilge le chéile!

Sin é cuspóir Na Cnocadóirí, a bunaíodh i 2003 chun gníomhaíochtaí cnocadóireachta trí Ghaeilge a chur chun cinn.   Is í an Ghaeilge teanga labhartha an Chlub. Cuireann siad fáilte roimh chomhaltaí nua a bhíonn toilteanach Gaeilge a labhairt.  Tá tú in ann tuilleadh eolais a fháil ar an suíomh www.cnocadóirí.com.

.

Siúlóid Sheachtainiúil timpeall Baile Átha Cliath, as Gaeilge!

Tharraing an teideal sin sa ‘Dublin Inquirer’ m’aird chomh luath agus a chonaic mé é.  Tá grúpa ann le blianta fada – ‘Let’s Walk and Talk as Gaeilge’ a thugann siad orthu féin, agus gach seachtain siúlann siad ar chuairt go láithreacha suimiúla ar fud na cathrach, ag caint Gaeilge an t-am go léir. Go minic, ag deireadh na siúlóide, bíonn Paidí Mhic Éil ag fanacht agus cóipeanna den iris ‘An Taobh Ó Thuaidh’ ina mhála aige – iris Ghaeilge atá foilsithe aige. Iris iontach is ea é, ach sin scéal eile do lá eile!

Nach bhfuil sé soiléir anois go bhfuil staid na Gaeilge bríomhar agus fuinniúil sa phríomhchathair, agus nach comhartha dóchais é sin go bhfuil todhchaí gheal ag ár dteanga?  

Diúltóirí: – cuir é sin faoi do cheann agus codail air!

  

gaGaeilge
gaGaeilge en_USEnglish