Bhuaigh Jessie Buckley Gradam Golden Globe as a ról cumhachtach mar Agnes sa scannán Hamnet, éacht a dheimhníonn a stádas mar cheann de na haisteoirí is fearr dá glúin. Tá gradaim mhóra eile bailithe ag an scannán freisin, ina measc an Scannán is Fearr agus an Stiúrthóir is Fearr ag féilte scannán idirnáisiúnta. Tugann na buanna suntasacha seo údar maith dúinn breathnú níos doimhne ar an sárshaothar seo. Seo thíos léirmheas cuimsitheach ar an scannán a bhfuil an domhan mór ag caint faoi, faoi láthair. Agus tá na Gradaim Oscar fós le teacht!

San athchóiriú nua corraitheach atá déanta ag Chloé Zhao ar leabhar Maggie O’Farrell, Hamnet, díríonn an ceamara ar bheatha an phríomhcharachtair – William Shakespeare (Paul Mescal). Nochtann an scannán a anam trí chora crua a shaoil, agus feiceann tú conas a eascraíonn a chuid ealaíne síoraí astu.

Ní scannán beathaisnéise sa chiall thraidisiúnta é seo. Ar bhealach, is scéal é faoi dhá bhreith: breith fhisiciúil mic, faoi chúram máthar i bhforaoisí Stratford, agus breith mheitifisiciúil dráma, faoi chúram athar i Londain. Is í tragóid a shaoil go bhfuil sé as láthair nuair a fhaigheann a mhac fisiciúil Hamnet (Jacobi Jupe) bás.

Scéal Dhá Dhomhan

Cuireann an Stiúrthóir Chloé Zhao, a bhfuil cáil uirthi as a máistreacht maidir le tírdhreacha nádúrtha (Nomadland, mar shampla), an chéad ghníomh suite go daingean i gceantar tuaithe in aice le Stratford-upon-Avon. Anseo, casaimid le hAgnes (Jessie Buckley, atá fíochmhar sa ról), bean na coille, bean leighis agus bean feasa atá níos compordaí i gcuideachta fabhcúin ná i measc daoine. Is iníon cailleach na coille í Agnes. Téann teagascóir óg Laidine (Paul Mescal) sa tóir uirthi agus ní ghlacann sé le diúltú.

Is fórsa cumhachtach í an cheimic athraitheach idir Buckley agus Mescal a thiomáineann an scannán chun cinn gan staonadh. Imríonn Mescal ról an drámadóra mar fhear óg tiomanta atá spreagtha chun peann a chur le pár. Áfach, de réir mar a mhéadaíonn an teaghlach agus na héilimh air, méadaíonn an t-achar eatarthu freisin. Caitheann sé cuid mhór dá chuid ama i Londain, a fhad is a bhíonn a bhean chéile ag tógáil a gclainne léi féin. Léiríonn an scannán é seo trí ghearradh go tapa idir solas órga an fhómhair i Stratford agus na hamharclanna clástrafóbacha faoi sholas coinnle i Londain.

Is mór an trua é nach bhfuil Shakespeare sa bhaile ach go hannamh agus a mhac, Hamnet, ag fás aníos. Is rud cruálach íorónta é go bhfuil Shakespeare i Londain ag cruthú ríthe agus fuirseoirí nuair atá a mhac féin, Hamnet, ag fáil bháis mar íobairt ag an bplá bhúbónach atá ag scuabadh na tíre.

Déantar scannánú ar thinneas Hamnet le dlúithe scanrúil. Feicimid cé chomh dona is atá an Galar Dubh, agus Hamnet ag fulaingt go huafásach. Feicimid fulaingt a mháthar freisin, agus í trína chéile ar fad ag screadach, gan William a bheith ann chun cabhrú. Tá a fhios go maith aici nach féidir lena luibheanna a mac a shábháil. Nuair a fhilleann William ar Stratford faoi dheireadh, tá sé ródhéanach agus tá Hamnet imithe ar shlí na fírinne.

Ailceimic an Bhróin

Tá Jessie Buckley go hiontach mar Agnes, ag léiriú a cuid mothúchán trína corp. Ní fheiceann tú William ag caoineadh bhás a mhic sa tslí chéanna. Ina ionad sin, cúlaíonn sé go Londain, ag fágáil a theaghlaigh ina dhiaidh uair amháin eile, chun dráma a scríobh a iompraíonn leagan d’ainm a mhic mhairbh.

Do hAgnes, agus b’fhéidir don lucht féachana freisin, mothaíonn sé seo mar fheillbheart. Méadaíonn an teannas i dtreo bhuaic mhór an scannáin, seicheamh a athraíonn Hamnet ó dhráma baile go sárshaothar scannánaíochta den chéad scoth.

An Chríoch Mhór

Taistealaíonn Agnes go Londain den chéad uair ansin, ag iarraidh a thuiscint cad atá i gceist ag Shakespeare lena dhráma in ainm a mhic. Téann sí isteach san amharclann. Seasann sí os comhair an stáitse agus tosaíonn sí ag féachaint ar an dráma. Agus í ag faire ar an aisteoir atá ag imirt Hamlet (deartháir Jacobi Jupe), feiceann Agnes a mac caillte. Agus ansin, tagann an Taibhse i láthair ar an stáitse. Le buille sárstiúrthóireachta, is é William féin Taibhse an Rí. Sa dráma, faigheann an t-athair bás ionas gur féidir leis an mac maireachtáil. Tá áit a mhic tógtha ag Shakespeare féin, i malartú suntasach.

Fanann an ceamara ar aghaidh Agnes agus an tuiscint seo ag teacht uirthi. Feictear mothúcháin éagsúla á léiriú ar a haghaidh, agus an fhearg ag athrú diaidh ar ndiaidh go tuiscint dhomhain choscrach.

Máistreacht Theicniúil

Is minic a bhíonn an ceamara láimhe in úsáid. Úsáidtear foinsí nádúrtha aon uair is féidir – tine, solas coinnle, agus fiú grian bhán Shasana. Cruthaíonn na teicnící cineamatagrafaíochta seo nasc níos dlúithe idir an ceamara agus an lucht féachana.

Tá an luas máistriúil freisin. In ainneoin an ábhair shollúnta, níl aon spotaí leamh ann. Tá móiminteam gan staonadh ag an scéal, tiomáinte ag práinn na plá sa chéad leath agus mistéir an dráma sa dara leath. Láimhseáiltear na cora agus na castaí le teagmháil dheaslámhach a chuirfidh iontas fiú orthu siúd a bhfuil eolas acu ar stair Shakespeare.

Breithiúnas

Is scannán é Hamnet a éilíonn go bhfeicfear é ar an scáileán is mó agus is féidir, chun an t-eispéireas tumthach a fháil ina iomláine. Is scéal é faoi chostas na huaillmhéine agus cumhacht shlánaithe na healaíne. Iarrann sé orainn machnamh a dhéanamh faoin tslí is fearr dúinn cothromaíocht oibre is saoil a bhaint amach agus cé chomh tábhachtach is atá sé am a chaitheamh sa bhaile i dteannta ár dteaghlaigh. Taispeánann sé dúinn freisin cumhacht na healaíne atá in ann réimse leathan na staide daonna a chur in iúl, idir mhaith agus olc.

Maidir leis na Gradaim Oscar, is dócha go mbeidh an bheirt Éireannach cáiliúla sin – Mescal agus Buckley – mar roghanna don Aisteoir is Fearr. Agus is dócha go mbeidh an scannán féin mar iomaitheoir láidir don Scannán is Fearr. Ba chóir do gach duine an t-am a ghlacadh chun an scannán seo a fheiceáil.